RUS
SMARTNEWS.KZ басылымының хабарлауынша, Алматыда Ресейдің жеке әскери компаниясы «Вагнермен» байланысы бар деп айыпталған Тимур Пралиевтің ісі қарала бастады. Сот процесі Алмалы аудандық сотында өтіп жатыр. Бұл туралы «За нами уже выехали» Телеграм-арнасы жазды.
Пралиев ҚР Қылмыстық кодексінің 172-бабы («Шет мемлекеттердегі қарулы қақтығыстарға немесе әскери іс-қимылдарға қатысу») бойынша айыпталуда.
Бұл есім қазақстандық БАҚ-та биылдың басында алғаш рет аталды. Сол кезде «Азаттық» радиосы Пралиевтің АҚШ-та Мексикамен шекараны заңсыз кесіп өтпек болғанда ұсталғанын хабарлаған еді. Тергеу дерегіне сәйкес, ол Рио-Гранде өзенін жүзіп өтуге тырысқан. Қолында қолма-қол ақша, рюкзакқа салынған дрон және екі түрлі паспорт — қазақстандық және ресейлік — болған.
АҚШ-тағы тергеу кезінде ол ресейлік ЧВК «Вагнермен» байланысы барын және Ресейде «жауынгерлік ардагер» куәлігін алғанын мойындаған. Кейіннен қандай жолмен Қазақстанға жеткізілгені ресми жария етілмеді, бірақ бүгін Пралиевтің Алматыда сот алдында жауап беріп жатқаны белгілі болды.
Айыпталушының мүддесін адвокатпен бірге әкесі — Ғалымжан Пралиев қорғауда. Ол бұған дейін ұлының он жылдан аса хабарсыз кеткенін айтып, жағдайға таңданысын білдірген.
Айта кетейік, Қазақстанда шет елдегі соғыс қимылдарына қатысқандарға қатысты қылмыстық іс соңғы айларда жиілеп отыр. Тамызда Атырау тұрғыны Украинадағы соғысқа қатысқаны үшін бес жылға бас бостандығынан айырылған еді.