RUS
SMARTNEWS.KZ басылымының хабарлауынша, журналист әрі блогер Кирилл Павлов Астанадағы полиция департаментіне Ауыл шаруашылығы министрі Айдарбек Сапаровқа қатысты арыз жазды.
Павловтың шағымына Сапаровтың қазақстандық сүт өнімдеріне қатысты сөзі себеп болған.
«Қазақстан 100% сүт өнімдерімен өзін-өзі қамтамасыз етеді деген шындыққа жанаспайтын ақпарат тарату фактісі бойынша ауыл шаруашылығы министрі Сапаровқа арыз жаздым. Президент әкімшілігі бұл істі бақылауға алсын», — деп жазды ол.
Журналисттің айтуынша, ресми статистика мен халықаралық деректер министрдің сөзіне қайшы. 2024 жылы Қазақстан 183 мың тонна сүт пен сүт өнімдерін импорттап, оған 410,7 млн доллар жұмсаған. Ірімшік пен сүзбе нарығының 48%-ы, май мен сүт-май өнімдерінің 15%-ы импортқа тәуелді.
Бұл Павловтың Ауыл шаруашылығы министрлігімен арадағы алғашқы дауы емес. Маусым айында блогер Астанада Республикалық фитосанитарлық диагностика және болжамдар әдістемелік орталығының талабымен сотта жеңілген. Ол кезде министрлік Жамбыл облысындағы шегірткеге қатысты мәліметті «жалған» деп тануды талап еткен еді.