RUS
SMARTNEWS.KZ басылымының хабарлауынша, Испанияның беделді спорт басылымы AS.com Алматыда өтетін тарихи ойынды ерекше атап өтті. 30 қыркүйекте Қазақстанда тұңғыш рет Чемпиондар лигасының осындай деңгейдегі матчы — «Қайрат» пен мадридтік «Реалдың» кездесуі өтпек.
Газеттің мәліметінше, билет сату 23 қыркүйекте басталып, сол күні-ақ түгел сатылып кеткен. Тіпті бір сәтте онлайн-кезекте 250 мыңға жуық адам тұрған — бұл Алматыдағы Орталық стадион сыйымдылығынан (23 мың орын) үш есе көп.
Еуропа БАҚ-ын ең қатты таңғалдырған — баға. Билеттер 30 мың теңгеден (шамамен 46 еуро) басталып, ең қымбат орындар 250 мың теңгеге (шамамен 400 еуро) дейін жеткен. Испандық журналистер мұны Қазақстандағы ең төменгі жалақыны ескергенде «аспанмен тең» деп атады.
Дегенмен AS.com жазғандай, бағалар Чемпиондар лигасының халықаралық стандарттарына сәйкес қойылған.
Ал қазақстандық жанкүйерлер әлеуметтік желіде бағаны ғана емес, онлайн-сауда платформаларының істен шығып, көпшілікті ұзақ кезекте қалдырғанын да сынға алды.