RUS
SMARTNEWS.KZ басылымының хабарлауынша, Қазақстанда онлайн-казиноны ғана емес, оны жарнамалаған блогерлерді де қылмыстық жауапкершілікке тарту мәселесі қаралып жатыр.
Бұл туралы Қаржы мониторингі агенттігі (ҚМА) төрағасының орынбасары Жеңіс Елемесов мәлімдеді.
«Онлайн-казино — лудоманияның басты себебі, ал бұл дерттен айығу өте қиын. Сол үшін біз тек ұйымдастырушыларды емес, жарнамалаушыларды да жазалауды ұсынып отырмыз. Қазір бұл ұсыныс мемлекеттік органдар деңгейінде талқылануда. Азаматтар қолдайды деп ойлаймын, өйткені қанша отбасы құмар ойын кесірінен күйрейді», — деді Елемесов.
Шенеунік блогерлердің ықпалы ерекше екенін атап өтті.
«Блогерлер — көптің сеніміне ие тұлғалар. Олар казиноны жарнамалағанда, адамдарды ойнауға итермелейді. Агрессивті жарнама көбіне жеңіл ақша уәде етеді, түрлі розыгрыштар ұйымдастырады. Сондықтан мұндай контенттің салдарынан қайғылы жағдайлар орын алса, блогерлер де жауапкершіліктен қашпауы тиіс», — деп қосты ол.
Бұған дейін сенатор Геннадий Шиповских та онлайн-казино мен жалған розыгрыштарды жарнамалаған блогерлерге жазаны күшейтуді ұсынған еді.