RUS
SMARTNEWS.KZ басылымының хабарлауынша, АҚШ-та 2024 жылы Дональд Трампқа қастандық жасамақ болған Райан Рутқа қатысты үкім жарияланған соң күтпеген жағдай болды. 59 жастағы ер адам сот залында өзіне қол жұмсамақ болып, мойнына қарындаш сұғып жібермек болғанын Bild жазды.
Оқиға Флорида штатының Форт-Пирс қаласындағы сотта тіркелді. Қауіпсіздік қызметкерлері жедел араласып, Рутқа ауыр жарақат салуға мүмкіндік бермеді.
«Әке, мен сені жақсы көремін! Ештеңе істеме, мен сені құтқарамын. Ол ешкімге зиян тигізген жоқ», – деп айғайлады сотта отырған оның қызы.
Бірнеше минуттан соң айыпталушыны қайтадан залға әкелді. Киімінде көзге көрінерлік қан іздері болмады.
Райан Рут 2024 жылғы қыркүйекте Флоридада Трамптың гольф алаңы маңында қарумен жасырынған жерінен ұсталған еді. Оны алдымен арнайы қызмет байқап, оқ атқанымен, Рут қашып кеткен, кейін қолға түсті.
Сот барысында ол өзін өзі қорғап, кінәсін жоққа шығарды.
«Мен шүріппені басқан жоқпын, сондықтан мені соттай алмайсыңдар» деп мәлімдеді. Бірақ алқабилер оны кінәлі деп таныды.
Райан Рутқа нақты жаза желтоқсанда жарияланады. Оған өмір бойына бас бостандығынан айыру қаупі төніп тұр.