RUS
SMARTNEWS.KZ басылымының хабарлауынша, Ақтөбеде жоспарлы кесарь тілігіне түскен жас ана ауыр жағдайға тап болды. Екі сәбиді дүниеге әкелген соң қуанышы көп ұзамай қайғыға ұласты. Операция кезінде ішкі ағзалары зақымдалып, қазір ол мүгедектікке жақын халде өмір сүріп отыр.
18 тамызда 2025 жылы Альбина Итегулова облыстық перинаталдық орталыққа жоспарлы кесарь тілігі үшін жатқызылған. Алайда ота барысында әйелдің қуық пен жатырына зақым келген. Енді бұл екі мүше арасында тесік пайда болып, олар «қосылғандай» жұмыс істейді.
«Қазір бәрі бір-біріне өтеді: жатырда жиналған сұйықтық қуыққа құйылады, ал қуықтағысы қайта жатыр арқылы шығады. Бұл дәрігердің салғырттығынан болды деп ойлаймын. Отадан кейін катетерде зәрдің орнына қан жинала бастағанын да бірден байқамады», – дейді науқас.
Альбина айтады, дәрігерлер алғашқы күндері жағдайдың күрделілігін аңғармаған. Тек бесінші күні қызуы көтерілгенде ғана тексеру жасап, ақауды анықтапты. Консилиум уростома қоюды ұсынған – яғни, сыртқа несеп шығаратын қосымша қапшық. Бұл тағы да жаңа операция деген сөз.
Жас ана қазір катетермен күн көруде.
«Бұл – адам төзгісіз азап. Не жүре алмайсың, не отыра алмайсың», – дейді ол.
Альбина қос сәбиіне күтім жасай алмай отыр. Оған қазір анасы көмектесуде, сол үшін жұмысынан да шығыпты.
Оқиға әлеуметтік желі арқылы көпшілікке белгілі болып, мәселе Денсаулық сақтау министрлігіне дейін жетті. Перинаталдық орталық болса, өз кінәсін мойындамайды.
«Ота тәжірибелі бригадамен жасалды, техникалық тұрғыда ешқандай ерекшелік болған жоқ. Мұндай асқынулар көбіне қайталанған кесарь тіліктерінен кейін пайда болады. Науқастың анамнезінде қуыққа жасалған бұрынғы операциялары да бар», – деп түсіндірді перинаталдық орталық директорының орынбасары Светлана Есенаманова.
Ал облыстық денсаулық сақтау басқармасы квота рәсімдеп, емін Қазақстанда жалғастыруға дайын екенін мәлімдеді.
«Барлық құжаттар дайындалады, біз толық қолдау көрсетеміз», – деді басқарма өкілі Айгүл Куштаева.
Бірақ Альбина Қазақстандағы емнен бас тартып отыр. Ол тек шетелдік мамандардың көмегі толыққанды өмірге қайта оралуға мүмкіндік береді деп сенеді. Сонымен қатар ол дәрігерлерді сотқа беруге дайындалуда.