RUS
SMARTNEWS.KZ басылымының хабарлауынша, Алматы облысында ірі жүк көлігі асфальттың шөгуінен жолға батып кетті. Оқиғаның видеосы әлеуметтік желіде тарады.
Белгілі болғандай, жағдай Іле ауданына қарасты Боралдай ауылындағы «Водник-3» шағын ауданында болған. Кадрларда бірнеше тонналық көлік қозғалып келе жатып, кенеттен астындағы асфальт опырылып, бір бүйірімен жерге кіріп кеткені көрінеді.
Куәгерлердің айтуынша, көлік біраз уақыт орнынан қозғала алмай тұрған. Жолдың астындағы топырақтың бос болуы немесе жер асты құбырларының ескіруі салдарынан асфальт шыдас бермеген болуы мүмкін деген болжам бар.
Әзірге ресми органдар жолдың неліктен опырылғанын нақтыламады. «Жолдың қашан және қалай жөнделетіні, сондай-ақ көліктің шығынын кім өтейтіні тексеру қорытындысынан кейін белгілі болады» деп хабарлады аудандық әкімдік.
Айта кетейік, бұған дейін де Алматы маңында бірнеше рет асфальттың ойылып, көліктердің батып кету оқиғалары тіркелген. Жергілікті тұрғындар мұндай жағдай жиілеп кеткенін айтып, жол сапасына алаңдаулы.