RUS
SMARTNEWS.KZ басылымының хабарлауынша, Израиль премьер-министрі Биньямин Нетаньяху жұма күні БҰҰ Бас ассамблеясында мінберге шығады. Оның жыл сайынғы сөзін биыл ерекше назарда күтіп отыр: бірқатар Батыс елдері ресми түрде Палестинаны мемлекет ретінде мойындап, Таяу Шығыстағы ахуалды ушықтырған соғысты тоқтатуға шақыруда.
Франция, Ұлыбритания, Бельгия, Португалия секілді елдер қолдаған «екі мемлекет» шешімі Нетаньяхудың пікірінше, «ешқандай негізсіз». Бұған қоса, Еуроодақ Израильге қарсы санкциялар пакетін талқылап жатыр.
Израиль басшысына Гаагадағы Халықаралық қылмыстық сот «адамзатқа қарсы қылмыстар» бойынша ордер шығарған. Ал БҰҰ-ның Жоғарғы сотында Оңтүстік Африканың «Израиль Газа секторында геноцид жасады» деген шағымы қаралуда. Тель-Авив бұл айыптауларды жоққа шығарып отыр.
Нетаньяху қарсыластарына жауап ретінде:
«Қанды қырғыннан кейін Палестинаны мойындағандар терроризмге үлкен сыйлық беріп отыр. Иорданның батысында палестиналық мемлекет болмайды», – деп қатаң мәлімдеді.
АҚШ Палестинаны әлі күнге дейін мемлекет ретінде мойындаған жоқ және Израильге қолдау көрсетіп келеді. Дегенмен президент Дональд Трамп кеше Израильдің Батыс жағалауды аннексиялауына жол бермейтінін айтты.
Бір күн бұрын БҰҰ-да Палестина басшысы Махмұд Аббас онлайн үндеу жасап, әлемді әділдікке шақырды:
«Палестина халқы оккупациядан құтылып, заңды құқықтарына ие болуы тиіс. Бұл халықаралық қауымдастықтың міндеті», – деді ол.
Палестиналықтар болашақ мемлекетті Иорданның батыс жағалауына, Шығыс Иерусалим мен Газада көруге үмітті. Алайда Нетаньяху мұндай жоспарға түбегейлі қарсы.