RUS
SMARTNEWS.KZ басылымының хабарлауынша, АҚШ президенті Дональд Трамп пен Израиль премьер-министрі Биньямин Нетаньяху Ақ үйде өткен кездесуде Газадағы қақтығысты тоқтатуға бағытталған жаңа жоспарды талқылады. Трамптың айтуынша, келісімге қол жеткізу «өте жақын».
Америкалық көшбасшы ұсынған 20 тармақтан тұратын құжатта ХАМАС 72 сағат ішінде барлық тұтқындарды босатса, соғыс тоқтатылатыны жазылған. Ал егер ұйым бұл шартты қабылдамаса, Вашингтон Израильге толық қолдау көрсететінін ескертті.
Нетаньяху өз кезегінде жоспарды құптап, ол Израильдің әскери мақсаттарына сай екенін атап өтті. Оның айтуынша, құжат ХАМАС-тың әскери және саяси әлеуетін жойып, Газаның енді қауіп төндірмеуін қамтамасыз етуі тиіс.
Жоспарға сәйкес, ХАМАС қаруын тастаса, оның мүшелері амнистия алады. Газада уақытша басқару органы құрылып, гуманитарлық көмек халықаралық ұйымдар арқылы жеткізілмек. Бұл процесті «Бейбітшілік кеңесі» қадағалайды, оның құрамында халықаралық саясаткерлер, соның ішінде бұрынғы Ұлыбритания премьері Тони Блэр болады.
Франция президенті Эммануэль Макрон бастаманы қолдады, ал Катар мен Мысыр өкілдері құжатты ХАМАС-қа ұсынған. Ұйым әзірге оны «мұқият» қарастыруда.
Айта кетейік, Нетаньяху жуырда Дохадағы авиациялық соққыдан қаза тапқан катарлық азамат үшін ресми түрде кешірім сұрады. Бұл Израильдің Катар аумағына жасаған алғашқы шабуылы еді.
Палестина өкілдері де Трамптың бастамасына үн қатып, бейбітшілікке қол жеткізу үшін бірлесіп жұмыс істеуге дайын екендерін мәлімдеді.
Қақтығыс 2023 жылғы 7 қазанда ХАМАС-тың Израильдің оңтүстігіне жасаған шабуылынан басталған еді. Содан бері 66 мыңнан астам палестиналық қаза тауып, ондаған мың адам жарақат алды.