RUS
SMARTNEWS.KZ басылымының хабарлауынша, Тараз қаласы әкімдігінің қаржы бөлімінің қызметкерлері мемлекет меншігіндегі жылжымайтын мүлікті заңсыз сатып, жеке тұлғаларға өткізіп отырған.
Бұзушылықты алдымен прокуратура анықтап, кейін істі Экономикалық тергеулер департаменті тергеген.
Тергеу барысында шенеуніктердің құжаттарды қолдан жасап, коммуналдық нысандарды өзге тұлғалар атына рәсімдеп келгені белгілі болды. Мемлекетке келген шығын көлемі 100 миллион теңгеден асты.
«Қаржы бөлімінің сектор меңгерушісі Молдажан Абсатов пен статист Жәнібек Қуанышев 2021–2022 жылдары қаладағы үш түрлі ауданнан үш нысанды жалған тұлғаларға рәсімдеп, кейін жеке адамдарға сатып жіберген», — деп хабарлады Orda.kz тілшісіне мемлекеттік органдағы дереккөз.
Сотта іс бойынша төрт адам қаралды. Алайда олардың екеуі — қаржы бөлімінің бұрынғы басшысы Жеңіс Паримбеков пен Тараздың ТКШ бөлімінің бұрынғы басшысы Мақсат Нұржанов — істің ескіру мерзіміне байланысты жауапкершіліктен босатылды.
Сот шешімімен Жәнібек Қуанышев алаяқтық пен сеніп тапсырылған мүлікті ысырап ету бабы бойынша кінәлі деп танылып, төрт жылға бас бостандығынан айырылды. Сонымен қатар ол бес жыл бойы мемлекеттік мүлікпен байланысты қызмет атқаруға тыйым салынды.
Ал Молдажан Абсатовқа төрт жарым жыл мерзімге бостандығын шектеу жазасы тағайындалып, мемлекеттік қызметте жұмыс істеу құқығынан өмір бойына айырылды.