RUS
«Туризм саласындағы инвестициялық ахуалды жақсартуға бағытталған шаралар жалғасын табады. Яғни даму әлеуеті жоғары ірі туристік инвестициялық жобаларды іске асыру көзделуде. Сонымен қатар біздің министрлік өңірлерде бизнеске қолдау көрсетеді. Нәтижесінде ішкі туризмде кәсіпкерлік белсенділік артуы тиіс», - деді Асхат Оралов өз баяндамасында.
Оның айтуынша, туризмді ілгерілету бағытындағы іс-шаралар жаңа тұжырымдамаға сәйкес жүргізіледі.
«Жоғарыда айтылған шараларды іске асыру нәтижесінде ішкі туристер саны 11 миллионға (2022 жылы 8,6 млн), ал шетелдік туристер саны 4 миллион адамға дейін (2022 жылы – 928 мың) артады деп күтілуде. Бұл отандық туризмге құйылатын инвестициялар өсімін 260 млрд теңгеге дейін (өткен жылы 131 млрд теңге) ұлғайтуға мүмкіндік береді. Салада 800 мың адам (былтыр 490 мың адам) жұмыспен қамтылады», - дейді ол.
Сондай-ақ министр ведомствоға жүктелген барлық міндет айрықша бақылауда екенін және Мемлекет басшысы тапсырмаларын сапалы орындау бойынша барлық қажетті шара қабылданатынын атап өтті.