RUS
SMARTNEWS.KZ басылымының хабарлауынша, Қазақстандық педагогтардың басым бөлігі өз кәсібіне риза. Бұл туралы Экономикалық ынтымақтастық және даму ұйымы жүргізген TALIS–2024 халықаралық зерттеуінің нәтижесінде белгілі болды.
Бұл зерттеу мұғалімдердің еңбек жағдайын, кәсіби дамуға мүмкіндік деңгейін, оқыту тәжірибесін және жалпы білім беру ортасын бағалауға бағытталған. Биылғы жылы Қазақстаннан 7 мыңнан астам педагог пен 369 мектеп директоры қатысқан.
Білім беру министрлігінің мәліметінше, TALIS — мұғалімдердің жұмыс ортасын жақсартуға арналған жалғыз ауқымды халықаралық зерттеу. 2018 жылмен салыстырғанда, отандық педагогтар қазір әкімшілік жұмыстарға аз уақыт жұмсап, оқыту мен ата-аналармен байланысқа көбірек көңіл бөле бастаған. Соның нәтижесінде қызметіне қанағаттанушылық деңгейі едәуір артқан.
Сонымен қатар, зерттеу нәтижесі мұғалімдердің еңбек жағдайының жақсарғанын көрсетті. Өткен оқу жылында педагогтардың апталық жұмыс уақыты орта есеппен 36 сағатты құраған. Ал 2018 жылы бұл көрсеткіш 50 сағат болған. Мұндай оң өзгеріс Экономикалық ынтымақтастық және даму ұйымы елдері арасында сирек кездесетін нәтиже деп бағаланған.
Қазір еліміздегі мұғалімдердің орта жасы – 41 жас, бұл көрсеткіш Экономикалық ынтымақтастық және даму ұйымы елдерінің орта деңгейінен төрт жасқа төмен.
Зерттеу деректері бойынша, педагогтардың 95 пайызы өз жұмысынан қанағат алады, ал олардың 80 пайызы қайта таңдау мүмкіндігі болса, мұғалім мамандығын қайта таңдар еді.