RUS
SMARTNEWS.KZ басылымының хабарлауынша, Air Astana директорлар кеңесі компанияның бас атқарушы директоры Питер Фостер 2026 жылдың наурыз айының соңында қызметінен кететінін хабарлады. Ол сонымен қатар директорлар кеңесінің құрамынан шығады. Дегенмен, Фостер әуе компаниялар тобына кеңесші ретінде жұмысын жалғастырады.
Компанияның қаржы жөніндегі атқарушы директоры Ибрахим Жанлыел осы кезеңде Air Astana-ның жаңа бас директоры болып тағайындалады.
Air Astana директорлар кеңесінің төрағасы Нұрлан Жақұпов Фостердің компанияға сіңірген еңбегіне алғыс білдірді:
«Директорлар кеңесі Питер Фостерге компанияны 20 жыл бойы табысты басқарғаны үшін шын жүректен алғыс айтады. Ол Air Astana-ны қалыптасу кезеңінен бастап бүгінгі таңда Орталық Азиядағы жетекші әуе компанияларының біріне және әлемдік авиациядағы танымал брендке айналдырды.
Сондай-ақ, біз Ибрахим Жанлыелдің жаңа қызметке тағайындалуын құптаймыз. Ол 2003 жылдан бері компанияда түрлі басшылық қызметтерде еңбек етіп, 2017 жылдан бері қаржы директоры лауазымын атқарып келеді. Компанияның дамуына қосқан үлесі зор. Біз оның басшылығымен Air Astana жаңа жетістіктерге жететініне сенімдіміз», – деді ол.