RUS
SMARTNEWS.KZ басылымының хабарлауынша, Талдықорғанда 22 жастағы Серікжан Өміртайдың өліміне қатысты қылмыстық іс бойынша сот үкімі шықты. Сот күдіктіні «Ауыр дене жарақатын келтіріп, абайсызда өлімге себеп болу» бабымен кінәлі деп танып, 10 жылға бас бостандығынан айырды.
Алайда марқұмның туыстары мұндай шешіммен келіспейді. Олар қылмыс алдын ала жоспарланған деп санайды және істі қайта қарауды талап етпек.
Қанды оқиға биыл 26 маусым түнінде бір тұрғын үйдің ауласында болған. Куәгерлердің айтуынша, Серікжан достарымен бірге демалып отырған кезде көрші кіреберістен бірнеше жігіт шығып, әңгіме қызу дауға ұласқан. Сол сәтте олардың бірі қалтасындағы пышақты алып, Өміртайды жаралаған.
«Ол Серікжанды сыртқа шақырып, шулаған кім екенін сұрамақ болды. Бірер секундта төбелес басталып кетті. Жақындап барсам, Өміртай жерге құлап түсті, киімінде қан дақтары бар еді. Кейін белгілі болды — пышақты ол алдын ала қалтасына салып қойған екен», — деді куәгер Шыңғыс Мұрат.
Талдықорған қалалық сотының шешімімен айыпталушы Бейтілеу Данияр орта қауіпсіздік мекемесінде 10 жыл жазасын өтейтін болды.
Дегенмен, марқұмның отбасы бұл үкім әділетсіз деп есептейді. Олар қасақана адам өлтіру бабымен қайта тергеу жүргізуді талап етіп отыр.
«Ұлым Үштөбеден Талдықорғанға жұмыс істеуге келген, отбасына көмектесіп жүрген еді. Күдікті оқиға алдында балконнан “өлтіремін” деп айғайлап, пышақты әдейі алып шыққан. Бұл — жоспарланған қылмыс», — деді Серікжанның әкесі.
Қазір Өміртайдың туыстары апелляцияға шағым түсіруге дайындалып жатыр.