RUS
SMARTNEWS.KZ басылымының хабарлауынша, медицина тарихында тұңғыш рет адамға генетикалық тұрғыда өзгертілген шошқаның бауыры салынды. 71 жастағы ер адам осы ағзамен 171 күн бойы өмір сүріп, шошқа мүшелері уақытша болса да адам ағзасының қызметін қамтамасыз ете алатынын дәлелдеді.
Зерттеушілер бұл оқиғаны медициналық серпіліс деп атады. Journal of Hepatology журналының мәліметінше, ота сәтті өткен, алайда кейін асқынулар байқалған.
Дүниежүзілік денсаулық сақтау ұйымының дерегінше, жыл сайын мыңдаған адам бауыр трансплантациясын күтіп көз жұмады. Мысалы, Қытайда жүздеген мың науқас бауыр жеткіліксіздігінен зардап шегіп отыр, бірақ соның тек 6 мыңы ғана трансплантация алады. Ғалымдар жануарлар ағзасын пайдалану тәжірибесі болашақта бұл тапшылықты азайтуға мүмкіндік береді деп сенеді.
Науқас – гепатит B мен бауыр обырынан зардап шеккен 71 жастағы ер адам. Дәрігерлер оған адам донорын таба алмаған соң, арнайы өсірілген Дианнань тұқымды шошқаның бауырын салған.
Бұл шошқаның ағзасына 10 түрлі генетикалық өзгеріс енгізілген: иммундық жүйенің бауырды қабылдамай тастау қаупін азайту және қан ұю процесін қауіпсіз ету үшін.
Алғашқы айда бауыр тұрақты жұмыс істеп, өт пен қан ұюға қажет ақуыздарды қалыпты деңгейде өндірген.
38-күні пациенттің жағдайы күрт нашарлаған. Дәрігерлер иммундық реакциялар мен қан тамырларының зақымдануынан туындаған тромботикалық микроангиопатияны (xTMA) анықтаған. Емдеу уақытша нәтиже бергенімен, кейін ішкі қан кету басталып, науқас 171-күні көз жұмған.
«Бұл тәжірибе шошқаның генетикалық тұрғыда өзгертілген бауыры адамның ағзасында ұзақ уақыт жұмыс істей алатынын дәлелдеді. Бірақ қан ұю мен иммундық асқынуларды бақылау әлі де басты мәселе болып тұр», — деді жетекші зерттеуші Байчэн Сун.
Мамандардың айтуынша, бұл оқиға — адам ағзасына жануар мүшесін салу (ксенотрансплантация) саласында жаңа кезеңнің бастауы.