RUS
SMARTNEWS.KZ басылымының хабарлауынша, Алматыда сот Тимур Пралиевті шетелдегі қарулы қақтығыстарға қатысқаны үшін 5 жылға бас бостандығынан айырды.
Тергеу мәліметінше, Пралиевті Ресей 2022 жылдың күзінде «Вагнер» жеке әскери компаниясына (ЧВК) жалдаған. Сол жылдың қарашасынан бастап ол Украинадағы соғысқа қатысып, байланысшы қызметін атқарған және Бахмут қаласын басып алу операциясына қатысқаны анықталған.
Кейін Пралиев Африкадағы Мали еліне жіберілген. Онда ол 2025 жылдың маусымына дейін «Вагнер» құрамында болған. Бұл Ресейдегі ЧВК басшысы Евгений Пригожиннің өлімінен кейінгі кезең еді.
Сот дерегіне сәйкес, ол 4,16 миллион рубль көлемінде ақша алып, Ресей азаматтығын иеленген, бірақ Қазақстан азаматтығынан шықпаған.
2024 жылдың қазанында Пралиев ЧВК қатарынан кеткеннен кейін Минск пен Уфада емделіп, Мексикаға ұшып барған. 2025 жылдың 4 қаңтарында ол АҚШ шекарасын заңсыз кесіп өтуге тырысқанда ұсталды. Тексеру кезінде одан екі паспорт, 4 мың доллар, 60 мың песо және дрон табылған.
Кейін АҚШ билігі оны Қазақстанға депортациялады.
Пралиевтің адвокаттары істі Ресейде қарауды сұрағанымен, сот оның жалданған сәтінде тек Қазақстан азаматы болғанын айтып, бұл талапты қанағаттандырмады.
Пралиев Қылмыстық кодекстің 172-бабы («Шетелдік қарулы қақтығыстарға қатысу») бойынша сотталған. Бұл бап «жалдаушылық белгілері жоқ» жағдайда қолданылады. Ал тікелей жалдамалылық үшін жазаны көздейтін 170-бап Қазақстанда әзірге қолданылған жоқ.