RUS
SMARTNEWS.KZ басылымының хабарлауынша, ҚР Еңбек және халықты әлеуметтік қорғау бірінші вице-министрі Асқарбек Ертаев өз отбасының ай сайынғы шығын көлемін жария етті. Бұл туралы Kazinform жазды.
Сенаттағы отырыс барысында журналистер сұрағына жауап берген шенеунік өзімен бірге төрт баласы тұратынын, олардың екеуі кәмелетке толып, жұмыс істеп жүргенін айтты.
«Қалған екі балаға жұбайым екеуіміз қараймыз. Әйелім жұмыс істемейді, өйткені кенже ұлымыз үш жаста, балабақшаға барады. Орта есеппен айына 500-600 мың теңге жұмсаймыз. Бұған балабақша төлемі, қызымның үйірмелері мен отбасылық өзге де шығындар кіреді», – деді Ертаев.
Ал өз жалақысына қатысты сұраққа ол нақты сома атамады:
«Біздің жалақымыз Үкімет қаулысымен реттеледі және бұл – «қызмет бабында пайдалану» санатындағы ақпарат. Егер ресми хат түрінде сұрау салынса, жазбаша түрде жауап беремін», – деп түсіндірді вице-министр.
Айта кетейік, бүгін Сенат жалпы отырысында ең төмен жалақыны белгілеу туралы №131 Халықаралық еңбек ұйымы конвенциясын ратификациялау туралы заңды мақұлдады.