RUS
SMARTNEWS.KZ басылымының хабарлауынша, Өзбекстан билігі мемлекеттік басқару жүйесін цифрландыру аясында екі мыңнан астам мемлекеттік қызметкерді қысқартпақ.
Тиісті жарлыққа ел президенті Шавкат Мирзиёев қол қойды. Қысқарту 2025 жылдың 1 қарашасына дейінаяқталуы тиіс. Ең көп қысқарту салық, су және ауыл шаруашылығы салаларында болмақ.
Құжатта көрсетілгендей, барлығы 2141 басқарушылық қызмет орны жойылады. Оның ішінде:
Салық комитетінде – 498,
Су шаруашылығы министрлігінде – 224,
Ауыл шаруашылығы министрлігінде – 200,
Еңбек және кедейлікті қысқарту министрлігінде – 163,
Экология министрлігінде – 176,
Әділет министрлігінде – 197 лауазым қысқартылады.
Қызметінен босатылғандарға жұмыс табуға Еңбек министрлігі мен Кәсіподақ федерациясы көмектеседі.
Бұл Өзбекстандағы алғашқы қысқарту емес. 2024 жылы әкімшілік реформа аясында шамамен үш мың шенеунік жұмыстан кеткен, кейбір мемлекеттік органдар таратылып, басқалары қайта құрылымдалған болатын.
Айта кетейік, Қазақстанда биыл Жасанды интеллект және цифрлық даму министрлігі құрылған. Президент Қасым-Жомарт Тоқаевтың айтуынша, жасанды интеллект мемлекеттік басқару мен экономиканы жаңғыртудың негізгі тетігіне айналуы тиіс.