RUS
SMARTNEWS.KZ басылымының хабарлауынша, Астанада 11 автокөлікті ұтысқа қойған және онлайн курс сатқан блогерлер Ерболат Жанабылов пен Эльмира Төлегеноваға қатысты аппеляциялық шешім шықты. Елордалық сот бірінші сатыдағы үкімді өзгеріссіз қалдырды.
Судья Жанна Нұрғалиева әр блогердің ісін бөлек қарады.
Ерболат Жанабылов ісі бойынша сот алқасы оның әрекетінде лотерея белгілері бар деген тұжырымды қолдады.
– Алғашқы сотта анықталған мән-жайлар мен дәлелдер жеткілікті деп есептеледі. Дегенмен кейбір жайттар қосымша нақтылауды қажет етеді. Ұтыс ойынында лотерея элементтері болғаны байқалады, сондай-ақ қатысу құны мен қатысушылар саны туралы нақты деректер ұсынылмаған, – деді судья шешім жариялау кезінде.
Эльмира Төлегенова ісіне қатысты да алғашқы сот шешімі өзгеріссіз қалды. Осылайша, қос блогердің аппеляциялық шағымы қанағаттандырылмады.
Бұған дейін Туризм және спорт министрлігі блогерлер ұйымдастырған автокөлік ұтыстарын назарға алған болатын. Іс кейін сотқа жетті.
Сондай-ақ министрліктің Ойын бизнесін және лотереяны реттеу комитеті Жанабылов сатқан курс бағасының негізсіз қымбат екенін хабарлаған.
Еске сала кетейік, блогер Ерболат Жанабыловқа қатысты алғашқы сот отырысы 5 қыркүйекте Астанада өткен еді.
Сол кезде оның адвокаты істі тоқтатуды сұраған, бірақ сот бұл өтінішті қабылдамаған.