RUS
SMARTNEWS.KZ басылымының хабарлауынша, қарапайым заттармен күрделі заңдылықтарды түсіндіретін физика пәні мұғалімі Боранбек Еркінбек қазнеттің жаңа жұлдызына айналды.
Оның сабағынан түсірілген бейнежазба TikTok-та жеті миллионнан астам қаралым жинап, мыңдаған оқушы мен ата-ананың алғысына бөленді.
Видеода педагог ауа толқынының қозғалысын түсіндіру үшін бар болғаны пластикалық бөтелке, түтік және бірнеше қарапайым құралды пайдаланады. Қарапайым, бірақ әсерлі тәжірибе дыбыс толқынының таралуын көзбен көруге мүмкіндік береді — тіпті физиканы ұнатпайтындар да қызығып қарайды.
«Бастысы — жай түсіндіру емес, көрсету. Оқушы ғылымды сезінуі керек», — дейді Боранбек Еркінбек.
Желі қолданушылары мұғалімнің тапқырлығына риза болып, оны «қазақ Эйнштейні», «физикаға қызығушылықты қайта оятқан ұстаз» деп атады.
Көпшіліктің пікірінше, дәл осындай жаңашыл ұстаздар ғана жаңа буынды ғылымға шабыттандыра алады.