RUS
Израиль тарапының хабарлауынша, ел әскерлері 24 сағат ішінде келісілген шепке шегінеді. Бұдан соң 72 сағаттық кезеңде Газа мен Израильде қалған тұтқындар мен палестиналық азаматтар біртіндеп босатылады және айырбасталады.
ХАМАС өкілі Халиль әл-Хайя келісімнің негізгі тармақтарын атады: Израиль шамамен 2 мың палестиналықты босатады, Мысырмен шекара өткелін ашады, гуманитарлық көмектің жеткізілуіне мүмкіндік береді және әскерін Газа аумағынан шығарады.
Оның айтуынша, израильдік түрмелерде отырған барлық әйелдер мен балалар азат етіледі. Сонымен қатар АҚШ пен өзге араағайын елдер — Қатар, Мысыр және Түркия — ХАМАС-қа соғыстың тоқтағанын растаған.
Вашингтон келісімнің орындалуын қадағалау үшін Израильге шамамен 200 америкалық әскери маманнан тұратын топ жібереді. Олар көпұлтты миссия құрамында жұмыс істеп, гуманитарлық көмекті үйлестіру және қауіпсіздікті қамтамасыз етумен айналыспақ.
Бұл — Трамп әкімшілігі дайындаған 21 тармақтан тұратын бейбіт жоспардың алғашқы егжей-тегжейлері.
Газа секторындағы екі жылға созылған соғыста 67 мыңнан астам палестиналық қаза тапқан. Келісім осы қантөгісті тоқтатуға бағытталған маңызды қадам ретінде қарастырылып отыр.