RUS
SMARTNEWS.KZ басылымының хабарлауынша, Қармақшы ауданындағы Шах-Шах шатқалында Қызылорда облыстық тарихи-өлкетану музейінің қызметкерлері ежелгі жануардың сүйектерін тапты.
Музейдің ғылыми хатшысы Асхат Сайлаудың айтуынша, табылған қалдықтардың нақты қай жануарға тиесілі екенін әзірге анықтау мүмкін емес. Алайда ғалымдар бұл бор дәуірінде өмір сүрген ежелгі жорғалаушының сүйектері екеніне сенімді.
«Қазір талдау жұмыстары жүргізіледі. Сүйектердің қай динозавр түріне жататынын анықтауға бірнеше ай кетуі мүмкін», — деді Асхат Сайлау.
Оның сөзінше, зерттеу ұзаққа созылуы елімізде палеонтолог мамандардың аздығымен де байланысты.
Ғалым сондай-ақ бұл аумақта мұндай табылған сүйектердің алғашқысы еместігін еске салды. 1950-жылдардың соңында дәл осы Шах-Шах шатқалында кеңес палеонтологы Анатолий Рождественский зерттеу жүргізіп, кейін «аралозавр» деп аталған ежелгі жорғалаушының сүйектерін анықтаған.