RUS
SMARTNEWS.KZ басылымының хабарлауынша, әлеуметтік желіде Балқаштағы абаттандыру жұмыстары кезінде ағаштардың түбімен қоса бетонмен құйылып жатқан сәттер түсірілген видео тарады. Бұл жағдай қала тұрғындарының ашуын туғызды.
Кадрлардан бірнеше көшеде тратуар төсеу кезінде мердігерлердің ағаштардың түбін толығымен бетонмен жауып тастағанын көруге болады. Соның салдарынан ағаш тамырлары ауа мен ылғалға қол жеткізе алмай қалған.
Тұрғындар мұндай әрекетті «жасыл желекке жасалған вандализм» деп атап, тиісті органдардан жағдайды түзетуді талап етті.
Редакция Liter.kz бұл оқиғаға қатысты Балқаш қаласының әкімдігінен түсініктеме сұрады.
«Қазіргі таңда мердігер ұйым — “TAZA QALA IJF” ЖШС — ағаштардың айналасындағы бетонды толық алып тастады. Ағаш түбі тазартылып, қалыпқа келтірілді», — деп хабарлады әкімдік өкілдері.
Сонымен қатар ведомство өкілдері егер мұндай жағдай қайталанса, мердігер ұйым Әкімшілік құқықбұзушылық туралы кодекстің 322-бабына сәйкес («Елді мекендердің аумақтарын абаттандыру ережелерін бұзу») әкімшілік жауапкершілікке тартылатынын атап өтті. Бұл айыппұл салу немесе келісімшартты бұзумен аяқталуы мүмкін.