RUS
SMARTNEWS.KZ басылымының хабарлауынша, Палестиндік ХАМАС ұйымы 737 күн тұтқында болған соңғы жеті израильдікті Қызыл Крест халықаралық комитетіне тапсырды. Бұл туралы 13 қазан күні Израиль мен Газа арасындағы Нецарим дәлізінде хабарланды. Тағы бір топ тұтқынды босату рәсімі күні бойы Хан-Юнис қаласында жалғасады.
Азат етілген адамдардың кейбірінің жағдайы ауыр екені айтылды. Оларды Израиль әскерилері Реим базасына жеткізіп, медициналық тексеруден өткізбек. Кейін олар туған-туыстарымен қауышады.
Босатылғандардың ішінде тірі жетпегендері де бар. Келісім бойынша, тұтқында қаза тапқандардың денелері 72 сағат ішінде Израиль жағына қайтарылуы тиіс.
Азат ету рәсіміне АҚШ президенті Дональд Трамп қатысты. Ол кейін Египетке ұшып, бейбіт келісімге қол қою рәсіміне қатыспақ. Египет тарапының хабарлауынша, 13 қазан күні Шарм-эш-Шейх қаласында өтетін халықаралық «бейбіт саммитке» 20-ға жуық елдің көшбасшылары қатысады. Олардың қатарында Ұлыбритания премьері Кир Стармер мен Германия канцлері Фридрих Мерц бар.
ХАМАС өкілдері бұл рәсімге қатыспайды — тек АҚШ, Израиль және ара ағайын елдердің делегациялары ғана болады.
10 қазаннан бастап күшіне енген оқ атпау режимі Трамп ұсынған бейбіт жоспардың алғашқы кезеңі болып саналады. Оның аясында Израиль қалған тұтқындардың бәрін босатуға келісті, ал ХАМАС жауап ретінде шамамен 250 өмір бойы сотталған палестиндікті және 1700-ге жуық тұтқынды азат етуге дайын.
Сонымен қатар, Израиль әскері Газадағы белгілі бір шепке дейін артқа шегінеді, ал аймаққа гуманитарлық көмек жіберіледі — Египеттен шамамен 400 жүк көлігі азық-түлік пен дәрі-дәрмек жеткізбек.
ХАМАС пен Израиль арасындағы соғыс 2023 жылдың 7 қазанында басталған еді. Сол күні ХАМАС Израиль аумағына басып кіріп, мыңдаған зымыран атқылаған. Шабуыл кезінде 1200 адам қаза тапты, тағы 250 бейбіт тұрғын тұтқынға алынды.
Жауап ретінде Израиль Газа секторында ауқымды әскери операция жүргізіп, соңғы екі жылда 67 мыңнан астам палестиндіктің қаза тапқаны хабарланды.
Қазір тараптар Трамптың жаңа бейбіт жоспары негізінде соғысты тоқтатуға келіскенмен, Газадағы билік пен қауіпсіздік мәселесі әлі ашық күйде қалып отыр.