НАТО Франция жағалауында Ресейдің «Новороссийск» сүңгуір қайығын байқады
НАТО бақылауды күшейткен.
SMARTNEWS.KZ басылымының хабарлауынша, Францияның Атлант жағалауында Ресейдің «Новороссийск» атты сүңгуір қайығы байқалды. Бұл туралы 9 қазанда НАТО-ның Теңіз қолбасшылығы әлеуметтік желідегі ресми парақшасында хабарлады.
Альянс мәліметінше, сүңгуір қайықтың қозғалысын Франция Әскери-теңіз күштерінің фрегаты бақылауда ұстап отыр.
«НАТО альянс мүшелерінің қауіпсіздігін қамтамасыз етуге дайын және Атлант мұхитының барлық аймағында теңіздегі жағдайды тұрақты бақылап отырады», – делінген ұйымның хабарламасында.
Ресей Қорғаныс министрлігі бұл ақпаратқа әзірге түсініктеме берген жоқ.
«Новороссийск» – 636.3 жобасы бойынша «Адмиралтей верфтері» зауытында жасалған алты сүңгуір қайықтың алғашқыларының бірі. Бұл үлгідегі қайықтар «Калибр-ПЛ» қанатты зымыранымен жарақталған және Қара теңіз флотына тиесілі.
Материал авторы
