Бишімбаев ешқандай “VIP” жағдайсыз отырғаны айтылды
Қылмыстық-атқару жүйесі комитетінің төрағасы Бишімбаевтың қарапайым түрмеде отырғанын айтты.
SMARTNEWS.KZ басылымының хабарлауынша, Ұлттық экономика министрлігінің бұрынғы басшысы Қуандық Бишімбаев ешқандай артықшылықсыз, басқа сотталғандармен бірдей жағдайда жазасын өтеп жатыр. Бұл туралы Ішкі істер министрлігі Қылмыстық-атқару жүйесі комитетінің төрағасы Абай Қайырбеков хабарлады.
«Бишімбаев жазасын қылмыстық-атқару заңнамасының барлық талаптарына сай өтеп жатыр. Ол басқа сотталғандармен бірдей жағдайда ұсталады», — деді Қайырбеков министрліктегі брифингте.
Журналистердің «Бишімбаев жұмыс істей ме?» деген сұрағына ол:
«Мұндай ақпарат жеке деректерге жатады, оны тек туыстарына немесе қорғаушыларына ғана айтуға болады», — деп жауап берді.
Комитет басшысы экс-министрдің ешқандай жеңілдігі жоқ екенін атап өтті:
«Ол басқа сотталғандармен бірге, бірдей жағдайда жазасын өтеп отыр. Қазір шамамен сотталғандардың жартысы еңбекпен қамтылған. Биыл олардың саны үш мың адамға артты, бұл бағыттағы жұмысты жалғастырамыз», — деді ол.
Абай Қайырбековтің айтуынша, Қуандық Бишімбаевтың денсаулығы қанағаттанарлық деңгейде.
Айта кетейік, бұрынғы министр азаматтық некедегі жұбайын өлтіргені үшін 24 жылға бас бостандығынан айырылған болатын. Бұған дейін интернетте Бишімбаев жазасын өтеп жатқан жерінен қашып кеткен деген сыбыс тараған. Ол кезде Қылмыстық-атқару жүйесі комитетінің өкілдері экс-министрдің нақты қай колонияда екенін ашып айтпады. Кейін құқық қорғаушы Бауыржан Мусин Бишімбаевтың Степногорск қаласындағы колонияда отырғанын мәлімдеген еді.
Материал авторы
