RUS
SMARTNEWS.KZ басылымының хабарлауынша, футболдан 2026 жылғы әлем чемпионатының іріктеу кезеңінде Қазақстан құрамасы Солтүстік Македониямен 1:1 есебімен тең ойнап, сенсация жасады. Бұл нәтиже македондық жанкүйерлер мен БАҚ-ты қатты таңғалдырды.
Sportsport.mk басылымы мақаласын «Бәрі 1:1 есебімен аяқталды: Қазақстан соққыны ең ауыр сәтте жасады» деп атаған. Авторлардың пікірінше, Солтүстік Македония бар күшін салғанымен, «жоғары деңгейде ойнаған Қазақстанды» жеңе алмады.
«Қазақстан алғаш минуттардан-ақ тіс қайрап ойнады, бірнеше рет қауіпті сәттер жасады. Ең айқын мүмкіндіктің бірі Ислам Чесноковқа тиді, бірақ ол басты сәтті пайдалана алмады», — деп жазады сайт.
Басылым атап өтеді: екінші таймның басында бәрі жоспардан тыс өрбіді — қақпашының қателігін пайдаланған Дінмұхамед Қараман керемет соққымен трибуналарды үнсіз қалдырды.
Ekipa.mk болса мақаласын былай атады: «Қазақстан бізден тікелей жолдаманы ұрлап кетті: енді тек плей-офф арқылы — мұхит асып бару үміті».
«Қазақстан еш қысымсыз келді, бірақ өте жинақы әрі сенімді ойнады. Алғашқы жарты сағатта олар алаң иелерінен жылдамырақ әрі батыл көрінді», — делінген мәтінде.
Басылым Қараманның «ударом через себя» стиліндегі соққысын ерекше атап өткен және Артур Шушеначевтің соңғы минуттардағы қауіпті сәтін де еске алған.
«Қонақтар тәртіпті, айқын құрылыммен ойнады — дәл осы жетіспеді Македонияға», — дейді Ekipa.mk.
Gol.mk сайты мақаласын «Қазақстан футбол мерекесін бұзды: Македония енді тек плей-оффқа үміт артады» деп атаған. Онда Қазақстанның батыл ойыны мен қақпашы Мухаммеджан Сейсеннің бірнеше қауіпті соққыны қайтарғаны ерекше аталып өтеді.
«Қазақтар қорықпады, өз жоспарымен ойнады. Бұл — еңбек пен сенімнің жеңісі», — деп түйіндеген автор.
MakFudbal.mk басылымы да Қазақстанның табандылығын жоғары бағалап, матчты былай қорытындылады:
«Қазақстан бізді қателігіміз үшін жазалады. Бұл нәтиже — олардың мінезі мен еңбегінің әділ сыйы».
Қазақстан құрамасы осы нәтижеден кейін өз тобында сенімді ойын көрсетіп, әлем чемпионатына іріктеуде басты күтпеген фавориттердің біріне айналды.