RUS
SMARTNEWS.KZ басылымының хабарлауынша, АҚШ президенті Дональд Трамп Израиль мен ХАМАС арасындағы екі жылға созылған соғысты тоқтатуға бағытталған тарихи келісімнен кейін енді Ресей мен Украина арасындағы соғысқа басымдық беретінін мәлімдеді.
13 қазанда Газа секторында атысты тоқтату туралы келісім іске асып, ХАМАС тірі қалған 20 израильдік тұтқынды босатты, ал Израиль түрмелерінен шамамен 2000 палестиналықты шығарды. Осыдан кейін Трамп:
«Енді басты мақсат – Ресейді тоқтату», — деді Иерусалимдегі Кнессеттегі сөзінде.
Президенттің айтуынша, ол Ресейдің Украинаға қарсы соғысын аяқтау үшін жаңа дипломатиялық қадамдарға дайындалып жатыр. Бұл мәселе жұма күні Вашингтонда өтетін Владимир Зеленскиймен кездесуде талқылануы мүмкін.
Зеленскийдің өзі де үмітін жасырмады:
«Бізге де бейбіт күн керек. Бүгін Таяу Шығыста бейбітшілікке қол жеткізілсе, ертең Еуропада да соны көруге мүмкіндік бар», — деп жазды Украина басшысы X-тегі парақшасында.
Трамп Израиль парламентінде сөйлеген сөзінде, АҚШ-тың Таяу Шығыстағы арнайы өкілі Стив Уиткоффтың еңбегін ерекше атап өтті. Сол дипломат бүгінде Ресеймен келіссөз жүргізуге де қатысып жүр.
«Ол Путинмен бес сағат бойы сөйлескен. “Не туралы сонша ұзақ сөйлестің?” деп сұрасам, “қызық тақырыптар көп болды” дейді», — деп әзілдеді Трамп.
Саяси сарапшылар Трамптың екі бағыттағы бейбіт бастамалары — Газа мен Украина — ортақ қағидаға сүйенетінін айтады: «бейбітшілік күш арқылы келеді».
Зеленский бұл идеяны қолдап отыр және Вашингтондағы кездесу кезінде Ресейге қысымды күшейту жолдарын талқыламақ.
Трамп пен Зеленскийдің алдағы кездесуі — АҚШ президенті қызметіне қайта оралғалы бері олардың бесінші жүздесуі болмақ. Бұған дейін екі көшбасшы Украина әуе қорғанысы мен алыс қашықтыққа ұшатын зымырандар жөнінде сөйлескен.
Айта кетейік, Трамп жақында Украинаға «Томагавк» зымырандарын жеткізу мүмкіндігін де жариялады. Бұл жаңалық Мәскеуде алаңдаушылық туғызды. Кремль өкілі Дмитрий Песков «мұндай қадам Ресейдің қауіпсіздігіне тікелей қатер төндіреді» деп мәлімдеді.
Зеленский мен Трамптың кездесуі халықаралық саясаттағы жаңа кезеңнің бастауы болуы мүмкін — Вашингтон бұл жолы Киевке нақты бейбіт келісімге жеткізетін шешім ұсынбақ.