Құлыбаевтардың табысы 1 млрд долларға өсті

Америкалық Forbes журналы әлемдегі ең бай адамдардың жыл сайынғы тізімін жариялады. Рейтингте алты қазақстандық және ел тұрғындары бар.

Тізімдегі 591-ші қатарда 62 жастағы Владимир Ким тұр. Оның байлығы 4,3 млрд долларға бағаланады. Өткен жылмен салыстырғанда, «Қазақмыс» корпорациясы акцияларының басым бөлігі мен «KAZ Minerals» акционерлік қоғамының үлесіне иелік ететін Кимнің кірісі азайып, 2022 жылы 5 млрд доллар болды.

Forbes журналының мәліметінше, экс-президент Нұрсұлтан Назарбаевтың қызы Динара Құлыбаева мен оның күйеуі Тимур Құлыбаевтың капиталы миллиард долларға өсті. Өткен жылы ерлі-зайыптылардың әрқайсысының табысы 3,8 млрд доллар болса, басылымның мәліметінше, ол биыл 4,3 млрд-қа жеткен. Олар рейтингтің 636-шы жолын бөліседі.

Кaspi Bank иелерінің бірі Вячеслав Кимнің капиталы бір жылда екі есеге жуық өсті. Өткен жылы оның байлығы 2 млрд долларды құраса, биыл 3,6 млрд-қа жеткен. Ким рейтингте 1513-тен 787-ге көтерілді.

Ресей азаматы және Қазақстан тұрғыны, Freedom Holding брокерлік компаниясының басшысы Тимур Турлов 1292-ден 949-орынға көтерілді. Оның байлығы өткен жылы 2,4 млрд доллар болса, биыл 3,1 млрд долларға бағаланған.

Бұрынғы президент Нұрсұлтан Назарбаевтың ісін басқарған 65 жастағы Болат Өтемұратов рейтингте 1096-дан 1104-ке төмендеді. Forbes оның байлығының 2,8 миллиардтан 2,7 миллиард долларға дейін төмендегенін нақтылтады.