RUS
SMARTNEWS.KZ басылымының хабарлауынша, Әзербайжанның мемлекеттік мұнай компаниясы SOCAR Қазақстандағы Дүнге кен орнын игеруге қызығушылық танытты. Бұл туралы энергетика вице-министрі Санжар Жаркешов мәлімдеді.
Оның айтуынша, «ҚазМұнайГаз» бен SOCAR арасында ынтымақтастық туралы меморандумға қол қойылған. Құжатта бірқатар бірлескен жобалар қарастырылған, соның ішінде Маңғыстау облысындағы Дүнге кен орны да бар.
«SOCAR Дүнге жобасына қатысу ниетін білдірді. Қазір екі елдің энергетика министрліктері арасында белсенді келіссөздер жүріп жатыр. Қазақстан өз тарапынан барлық қолдауды көрсетуге дайын», — деді Санжар Жаркешов.
Дүнге кен орны Түпқараған ауданында 1966 жылы ашылған. Қоры шамамен 106 млн тонна мұнай мен 6 млрд текше метр газға бағаланады. Жоба 1994 жылдан бері Oman Oil Company Ltd компаниясымен бірлесіп, өнімді бөлу туралы келісім негізінде жүзеге асып келеді. 2000 жылы сынамалық өндіру басталып, 2007 жылы толық көлемде іске қосылған. 2019 жылы келісім мерзімі 2039 жылға дейін ұзартылды.
2023 жылдың соңында «ҚазМұнайГаз» француздық TotalEnergies компаниясының жобадағы 60 пайыздық үлесін сатып алды. Қазір кен орнын игеруге «ҚазМұнайГаз», Oman Oil Company Ltd (20%) және Кайман аралдарында тіркелген Partex Kazakhstan Corporation (20%) қатысып отыр.
Әзербайжан энергетика министрі бұған дейін SOCAR Қазақстан мұнайын «Баку – Тбилиси – Джейхан» құбыры арқылы тасымалдау көлемін арттыруды көздеп отырғанын айтқан. 2027 жылға қарай бұл көлемді жылына жеті миллион тоннаға дейін ұлғайту жоспарланып отыр.
Мамандардың пікірінше, SOCAR-дың Қазақстандағы кен орындарына келуі екі ел арасындағы энергетикалық әріптестікті күшейтіп, Астанаға Ресейден тыс жаңа экспорттық бағыттарды белсендірек пайдалануға мүмкіндік береді.