RUS
SMARTNEWS.KZ басылымының хабарлауынша, Қазақстан Бас прокуратурасының Құқықтық статистика және арнаулы есеп комитеті білім беру саласына бағытталған жаңа кибершабуылдар толқыны туралы ескертті.
Мекеменің Қоғамдық қауіпсіздік пен қылмыстық қатерлерді болжау орталығының мәліметінше, соңғы уақытта хакерлер оқытушылар мен жоғары оқу орындарының қызметкерлерін жиі нысанаға алып отыр.
Шетелдік деректерге сүйенсек, АҚШ-тағы 25 университеттің 6 мыңнан астам ұстазы киберқылмыскерлердің құрбаны болған. Алаяқтар жалақы аударылатын банк деректерін қолдан бұрмалап, қызметкерлердің еңбекақысын өз шоттарына бағыттаған.
Комитет мұндай тәсілдердің басқа елдерде, соның ішінде Қазақстанда да қолданылуы әбден мүмкін екенін ескертті.
Ведомство азаматтарға кибергигиенаны сақтау қажеттігін еске салады: күмәнді сілтемелерге өтпеу, белгісіз хаттардағы файлдарды ашпау, күрделі пароль қолдану және екі факторлы аутентификацияны қосу ұсынылады.