RUS
SMARTNEWS.KZ басылымының хабарлауынша, АҚШ президенті Дональд Трамп Газадағы қантөгіс тоқтамаса, ХАМАС тобына қарсы қатаң шара қолданатынын мәлімдеді.
«Бұл істі біз емес, бізге өте жақын, жанымыздағы адамдар атқарады. Олар бәрін біздің басшылығымызбен оңай орындайды», — деді Трамп Ақ үйде журналистер алдында сөйлеген сөзінде.
Бұл мәлімдеме ХАМАС жасаған қоғамдық жазалау видеолары жарияланғаннан кейін айтылды.
Трамптың айтуынша, егер ХАМАС келісім талаптарын орындамай, бейбіт тұрғындарды өлтіруді жалғастырса, АҚШ «басқа амалсыз, оларды жоюға мәжбүр болады».
«Егер ХАМАС Газада адамдарды өлтіруді жалғастырса, бізде басқа жол қалмайды — кіріп, оларды жоямыз. Бұл — ескерту», — деп жазды Трамп өз Truth Social парақшасында.
Ақ үй Трамптың сөздеріне қатысты түсініктеме бермеді. Дегенмен президент АҚШ әскері Газада соғысқа қатыспайтынын нақты айтты.
«Бұл біз болмаймыз. Бізге мұны істеудің қажеті де жоқ. Бізге өте жақын бір ел бар, олар бәрін жасайды», — деді ол.
Көпшілік бұл сөздерді Трамптың Израильге меңзеп айтқаны деп қабылдады. Алайда мұндай әрекет қазіргі оқ атпау келісімін бұзу болып саналады.
Бұған дейін Трамп ХАМАС-тың «қауіпті бірнеше топты жойғанын» айтып, бұл ұйымның қарусыздануы тиісекенін ескерткен болатын.
«Олар өз еркімен қаруларын тапсырады. Егер бұлай болмаса, біз олардың қаруын тартып аламыз. Бұл жылдам әрі, мүмкін, қатал түрде орындалады», — деді ол.
Газада соңғы айларда ХАМАС билігі әлсіреген. Израиль әскері аумақтың басым бөлігін бақылауға алған соң, билік орнына жергілікті қарулы топтар мен әулеттер келіп, гуманитарлық көмекті өз пайдасына жаратты деген айыптар айтылып жатыр.
Трамп ұсынған бейбіт келісімге сай, ХАМАС барлық тұтқындарды — тірі не қаза тапқандарды — өткен дүйсенбіге дейін қайтаруы тиіс еді.
Алайда ХАМАС өзінде бар тұтқындардың сүйектерін ғана қайтарып, қалғандарын табу үшін арнайы техника қажет екенін алға тартты.
Израиль премьер-министрі Биньямин Нетаньяху бұған жауап ретінде:
«Біз ымыраға бармаймыз. ХАМАС келісім талаптарын толық орындауы тиіс», — деп мәлімдеді.
Ақ үй бұл жағдайды келісімнің бұзылуы деп есептемесе де, Израиль қоғамында ашу мен наразылық күшейіп отыр.