RUS
SMARTNEWS.KZ басылымының хабарлауынша, елдегі бірқатар клубтар алдағы уақытта жеке инвесторлардың иелігіне өтпек. Бұл туралы премьер-министр Олжас Бектенов Нартай Сәрсенғалиевтің депутаттық сауалына берген жауабында мәлімдеді.
Үкімет басшысы атап өткендей, футбол клубтары мен олардың инфрақұрылымын жекешелендіру процесі белсенді жүріп жатыр. Бұл бастама Президент Қасым-Жомарт Тоқаевтың тапсырмасымен іске асуда. Мемлекет басшысы спорт саласында бизнестің заңдары жұмыс істеуі тиіс екенін, ал жеке инвестициялар – футболдың дамуының жалғыз жолы екенін атап өткен.
Депутаттық сауалға жауап берген премьер-министр Олжас Бектеновтің айтуынша, клубтарды сатып алуға бірнеше ірі кәсіпкерлер мен компаниялар қызығушылық танытқан:
«Орталық Азия отын-энергетикалық компаниясы» АҚ (Сергей Кан) – «Қызыл-Жар» клубын иеленуді жоспарлап отыр;
Freedom Finance (Тимур Тұрлов) – «Шахтёр» клубына арналған жаңа стадион мен футбол академиясын салмақ;
Kaspi Group (Михаил Ломтадзе) – «Жеңіс» клубын сатып алып, елордада футбол инфрақұрылымын дамытуды көздейді;
TAU GROUP LTD (Ислам Қозбақов) – «Қайсар» клубын жекешелендіруге дайын.
Сондай-ақ, «Тараз», «Елімай» және «Ертіс» клубтары бойынша келіссөздер жүріп жатыр. Үкімет осы процесті жылдамдату үшін 2021–2025 жылдарға арналған жекешелендірудің кешенді жоспарын жаңартып жатыр. Құжат қазіргі уақытта мемлекеттік органдардың келісімінен өтуде.
Премьер-министрдің айтуынша, әзірге клубтар сатылған жоқ, бірақ олар бюджеттен қомақты қолдау алып отыр. 2025 жылы футболға 34,9 млрд теңге бөлінген, оның ішінде 31,8 млрд теңге кәсіби клубтарға, ал небәрі 3,1 млрд теңге балалар және бұқаралық спортқа бағытталған.
Тексерулер тұрақты түрде олқылықтарды анықтап келеді: 2021–2025 жылдары 12-ден астам аудит жүргізіліп, 100-ден аса заңбұзушылық табылған. Соның ішінде артық сметалар, қайталанатын қызметтер және тиімсіз шығындар бар. «Ақтөбе» мен «Қызыл-Жар» клубтарында жемқорлық белгілері анықталған — прокуратура 250 млн теңгеден астам қаржының мақсатсыз жұмсалғанын мәлімдеді.
2026 жылдан бастап жаңа ережелер күшіне енеді.
Бұған дейін Қасым-Жомарт Тоқаев футбол клубтарын жекешелендіруді жеделдетуді тапсырған еді. Президенттің айтуынша, спорт бизнес заңдарымен жұмыс істеуі тиіс, ал жеке инвестиция – футболдың дамуының жалғыз жолы.