Әскер қатарына тіркеу тәртібі жаңарды. Әйелдер де есепке алынуы мүмкін

SMARTNEWS.KZ басылымының хабарлауынша, Қазақстанда әскери есеп ережелеріне өзгерістер енгізілді. Қорғаныс министрі 2025 жылғы 13 қазандағы №1427 бұйрығымен әскери есепке алу тәртібіне бірқатар өзгеріс пен толықтыру енгізді. Құжат 2017 жылғы 24 қаңтардағы №28 бұйрықтың жаңартылған нұсқасы болып табылады.

Негізгі өзгерістер:

Жаңа ережеге сәйкес, әскери есепке алынуға жатпайтын азаматтар тізімі нақтыланды. Енді:

әскери есеп мамандығы жоқ әйелдер;

жасы шекті межеге жетіп, резерв қатарынан шығарылған немесе әскери қызметке жарамсыз деп танылғандар;

бас бостандығынан айырылған азаматтар;

Қазақстаннан тыс тұрақты тұратындар;

құқық қорғау және арнайы мемлекеттік органдардың, сондай-ақ азаматтық қорғау жүйесінің әскери оқу орындарында оқитын курсанттар мен қызметкерлер есепке алынбайды.

Әскери есеп мерзімі мен жас шектері де өзгерді.

Жаңа тәртіп бойынша:

офицерлер бірінші разрядта 50 жасқа дейін, ал қатардағы және сержанттар 40 жасқа дейін есепте тұрады;

екінші разрядқа офицерлер 51–60 жас, ал қатардағы және сержанттар 41–50 жас аралығында кіреді;

әйелдер үшін әскери есеп мерзімі қысқартылды: офицерлер — 45 жасқа дейін, ал қатардағы және сержанттар — 35 жасқа дейін.

Бұған қоса, прапорщиктер мен мичмандар да енді екінші разрядта 50 жасқа дейін есепте тұрады.

Жаңа ереженің тағы бір маңызды тұсы — азаматтарды жергілікті әскери басқару органдарына (МӨББ) тіркеу тәртібі нақты жазылған.
Енді әскери есепке:

17 жасқа толған ер балалар,

бұрын есепке тұрмаған азаматтар,

Қазақстан азаматтығын жаңа қабылдаған тұлғалар,

сондай-ақ әскери мамандығы бар әйелдер тіркелуге міндетті.

Қорғаныс министрлігі бұл өзгерістер азаматтарды әскери есеп жүйесіне әділ әрі заманауи талаптарға сай енгізуді көздейтінін мәлімдеді.