RUS
SMARTNEWS.KZ басылымының хабарлауынша, Иранның жоғарғы рухани жетекшісі аятолла Әли Хаменеи АҚШ президенті Дональд Трамптың келіссөздер жөніндегі ұсынысын қабылдамай, Вашингтонның Иранның ядролық әлеуетін жойғаны туралы мәлімдемесін жоққа шығарды.
Reuters агенттігінің хабарлауынша, Тегеран мен Вашингтон арасындағы ядролық мәселеге қатысты жанама келіссөздердің бес раунды маусым айындағы 12 күндік әуе соғысынан кейін тоқтаған. Сол кезде АҚШ пен Израиль Иранның бірнеше ядролық нысандарына соққы жасаған еді.
«Трамп өзін мәмілегер ретінде көрсеткісі келеді, бірақ егер келісім күшпен таңылса, оның нәтижесі алдын ала анықталса, бұл келісім емес — зорлық пен үстемдік», — деді Хаменеи мемлекеттік БАҚ-қа берген мәлімдемесінде.
Өткен аптада Дональд Трамп Израиль парламентінде сөйлеген сөзінде Вашингтон мен Тегеран арасында «бейбіт келісімге» қол жеткізу мүмкіндігін оң бағалап, Газа секторында Израиль мен ХАМАС арасындағы атысты тоқтату туралы келісімнен кейін диалог орнату «жақсы болар еді» деген пікір айтқан.
Бұған жауап ретінде Хаменеи:
«АҚШ президенті мақтанып, біздің ядролық өнеркәсібімізді жойдық дейді. Өте жақсы, армандай берсін! Иранның ядролық нысандары бар ма, жоқ па — оған Американың не қатысы бар? Мұндай араласу орынсыз әрі зорлықшыл әрекет», — деп мәлімдеді.
Батыс елдері Иранды уран байыту арқылы жасырын түрде ядролық қару жасауға талпынып отыр деп айыптайды. Алайда Тегеран бұл айыптауды жоққа шығарып, бағдарлама тек бейбіт энергетикалық мақсатқа бағытталғанын айтады.