RUS
SMARTNEWS.KZ басылымының хабарлауынша, Мәжіліс депутаттары коммерциялық ұйымдардың, соның ішінде банктердің атауларында «халық» және «народный» сөздерін пайдалануға шектеу қоюды ұсынып отыр. Тиісті ұсыныс 50-ден астам депутат қол қойған бастаманың бір бөлігі ретінде «Банктер және банк қызметі туралы» заңға өзгеріс енгізу туралы жобада көрсетілген.
Ұсынысқа сәйкес, банктердің атауы бірқатар талаптарға сай болуы тиіс. Атап айтқанда, заңға «банктер өз атауында «ұлттық», «орталық», «мемлекеттік», «республикалық», сондай-ақ «халық», «народный» сөздерін толық немесе қысқартылған түрде кез келген тілде қолданбауы тиіс» деген норма енгізу көзделген.
Депутаттардың түсіндіруінше, «халық» ұғымы Қазақстан Конституциясында ерекше құқықтық және символикалық мәнге ие. Негізгі заңның 3-бабында «мемлекеттік биліктің бірден-бір бастауы — халық» деп көрсетілген. Сондықтан бұл термин жеке коммерциялық ұйымдарға емес, бүкіл қоғамға қатысты деп саналады.
Бастаманы қолдаушылардың пікірінше, мұндай сөздерді жеке меншік банктердің атауында қолдану азаматтарды шатастырып, олардың ұйымды мемлекетпен немесе қоғамдық құрылыммен байланысты деп қабылдауына себеп болуы мүмкін.
Депутаттар сондай-ақ халықаралық тәжірибеде «ұлттық», «халықтық», «мемлекеттік» сияқты сөздер тек мемлекеттік немесе қоғамдық меншікке тиесілі институттарға арналғанын атап өтті.
Ұсынысқа Мәжіліс депутаттары Марат Бәшімов, Бақытжан Базарбек, Абзал Құспан, Ермұрат Бапи, Ринат Заитов, Мақсат Толықбай, Нартай Сәрсенғалиев және басқа да 40-тан астам халық қалаулысы қол қойған.