RUS
SMARTNEWS.KZ басылымының хабарлауынша, Мемлекеттер басшылары екіжақты келіссөз өткізіп, Қазақстан – Әзербайжан Жоғары мемлекетаралық кеңесінің қорытындылары бойынша бірлескен брифинг ұйымдастырды. Президент Тоқаев алдымен Әлиевтің шақыруды қабыл алып, Астанаға арнайы келгені үшін ризашылығын білдірді.
Брифингте Әзербайжан Президенті Ильхам Әлиевтің Астанаға мемлекеттік сапары аясында Қасым-Жомарт Тоқаев екі ел арасындағы стратегиялық серіктестікті жоғары бағалап, әріптесіне мұнай мен уран тасымалына қолдау көрсетіп отырғаны үшін алғыс айтты.
«Былтыр Әзербайжан арқылы қазақстандық мұнай транзиті бір жарым миллион тоннаға жуықтады. Бұл – екі елдің табысты серіктестігінің айқын көрінісі. Алдағы уақытта бұл көлемді едәуір арттыру жоспарланып отыр. Сонымен қатар Әзербайжан аумағы арқылы қазақстандық уран өнімдерін жеткізу бағытында да үлкен жұмыс атқарылуда. Осы бастамаларға тұрақты қолдау көрсетіп келе жатқан Ильхам Гейдарұлына алғысымды білдіремін», – деді Мемлекет басшысы.
Кездесуде энергетика, көлік және цифрландыру салаларындағы ынтымақтастық басты назарда болды. Президент Тоқаев теңіз табаны арқылы төселетін электр кабельдері жобасының ұлттық энергия жүйесін дамытуға серпін беретінін, сондай-ақ «жасыл» энергия экспортындағы Қазақстанның позициясын күшейтетінін атап өтті.
Сондай-ақ тараптар ІТ және жасанды интеллект саласындағы серіктестік мәселесін талқылады. Тоқаев Қазақстанның цифрлық үкімет құру мен ІТ-индустрияны дамыту тәжірибесімен бөлісуге дайын екенін айтты.
«Каспий теңізінің түбімен талшықты-оптикалық байланыс желісін тарту жобасын жеделдету қажет. Бұл өңірлік цифрлық интеграцияға серпін береді. Үкіметтерге осы бағытта нақты іс-шаралар жоспарын әзірлеу тапсырылды», – деді Президент.
Келіссөздер қорытындысы бойынша екі ел басшылары стратегиялық серіктестікті жаңа деңгейге көтеруге ниетті екенін растады.