RUS
SMARTNEWS.KZ басылымының хабарлауынша, Түрікменстанның Лебап уәлаятында президент Сердар Бердімұхамедовтың сапары кезінде жүкті әйел ауруханаға жете алмай, қайтыс болды.
«Азатлык» радиосының түрікмен қызметі хабарлауынша, оқиға 15 қазанда Түрікменабат қаласында болған. Сол күні Бердімұхамедов химиялық зауыттың іргетасын қалау рәсіміне қатысып, соның салдарынан қаладағы барлық жол уақытша жабылған.
Жергілікті дәрігерлер мен полиция қызметкерлерінің айтуынша, жолдардың жабылуы салдарынан жедел жәрдем көліктері де ауруханадан шыға алмаған.
«Сол күні жедел жәрдем көліктерінің бірде-бірі қала тұрғындарының шақыруына бара алмады. Қорғаныс қызметі машиналарды аурухананың ауласынан шығаруға да рұқсат бермеді», — дейді жергілікті медицина қызметкерлері.
Осы сәтте бір ер адам жүкті әйелін ауруханаға өз көлігімен жеткізбек болған, алайда күзетшілер көлікті өткізбеген. Әйел жолда көз жұмған.
Куәгерлердің айтуынша, ер адам тізерлеп, күзетшілерден өтініп жылаған, бірақ оған жол ашылмаған.
«Оған “айналып, басқа ауруханаға барыңыздар” деді. Алайда олар жеткенше әйел мен іштегі бала шетінеген. Дәрігерлер “Сіздер кешіктіңдер” деп, бірден полиция шақырған», — дейді жергілікті полиция өкілі.
Кейін ер адамға бұл туралы ешкімге айтпау ескертіліп, оның баласына зиян келуі мүмкін деп қорқытқан.
Лебап уәлаятының ресми өкілдері оқиғаға қатысты түсініктеме беруден бас тартқан.
Түрікменстан тұрғындары жоғары лауазымды тұлғалардың сапары кезінде жолдардың бірнеше сағат бойы жабылатынына жиі шағымданып келеді.