RUS
SMARTNEWS.KZ басылымының хабарлауынша, Үкімет алдағы үш жылға арналған республикалық бюджетті бекітіп, 2026 жылы ел қаржысының қай бағыттарға жұмсалатынын нақтылады. Министр Мәди Такиевтің айтуынша, басты басымдық — халықтың тұрмыс сапасын жақсарту мен экономиканың тұрақты дамуы.
Денсаулық сақтау саласына 2,7 трлн теңге бөлінеді. Бұл биылғыдан 107 млрд теңгеге көп. Қосымша қаражат медициналық қызметтердің қолжетімділігін арттыруға бағытталады.
Білім мен ғылымға 901,7 млрд теңге қарастырылған. Үкімет сапалы білім беру, дарынды жастарды қолдау және ғылыми орталықтарды дамыту ісін жалғастырмақ.
Мәдениет, туризм және спорт салаларына 263,5 млрд теңге бөлінеді. Бұл қаражат елдің имиджін көтеріп, экономикалық өсуді қолдауға жұмсалмақ.
Экономиканы ынталандыруға шамамен 1,2 трлн теңге бағытталады. Нақты секторды дамытуға бөлінетін қаржы 540 млрд теңгеге өсіп, 3,7 трлн теңгеге жетпек. Бұл өндіріс пен инвестицияның жаңа бағыттарын ашуға мүмкіндік береді.
Өңірлерді дамыту — тағы бір басты міндет. 2026 жылы бұл мақсатқа 300 млрд теңге жұмсалады, ал үш жылдық кезеңде жалпы сома 581 млрд теңгеге жетеді. Сонымен қатар, жергілікті әкімдіктердің дербестігін арттыру үшін өңірлерге 5,1 трлн теңге трансферт бөлінеді.
Күштік құрылымдарға 3 трлн теңге қарастырылған — бұл биылғыдан 335 млрд теңгеге артық. Осылайша, қорғаныс шығындары елдің жалпы ішкі өнімінің шамамен 1 пайызын құрайды. Министрдің сөзінше, бұл қаражат тек әскери дайындыққа ғана емес, сондай-ақ қорғаныс саласындағы инновациялық жобаларды дамытуға да жұмсалмақ.