RUS
SMARTNEWS.KZ басылымының хабарлауынша, мұнай-газ саласының сарапшысы Асқар Исмаилов үкіметтің жанармай бағасын уақытша «тоқтату» туралы шешімі мен салық кодексіндегі өзгерістерге қатысты пікір білдірді. Ол өз ойын «Что по деньгам?» подкастында айтты.
Исмаиловтың айтуынша, бағаның өсуіне енгізілген мораторий — экономикалық емес, саяси шешім. Бұл қоғамдағы қысымды азайтып, экономиканы тұрақтандырудың өзге жолдарын іздеуге уақыт ұтып алу әрекеті.
«Алдағы айларда бензин тапшылығы болмайды. Егер Ресейден жеткізуде қиындықтар туындаса, Қазақстан қытайлық отынмен оны алмастыра алады. Халықтың көбі бұған дайын», — деді сарапшы.
Алайда ол нақты қауіптің 2030 жылдарға қарай туындауы мүмкін екенін ескертті. Ел ескі кен орындарындағы өндірісті қолдау мен барлауға инвестиция салмаса, мұнай өнімдерінің жетіспеушілігіне тап болуы ықтимал.
Исмаиловтың пікірінше, ішкі нарықтағы арзан баға көрші елдерге жанармайдың заңсыз тасымалына жол ашады. Бірақ бағаны көршілер деңгейіне көтеру мәселені шешпейді.
«Мәселе — мұнайшыларды қолдау мен баға қалыптастыру жүйесін өзгертуде», — дейді ол.
Сондай-ақ сарапшы салық саясаты мен әлеуметтік саланың да қоғамға әсерін атап өтті.
«Барлық ауыртпалықты халықтың мойнына ілуге болмайды. Көлік саласында елдің жартысы жұмыс істейді. Реформалар өмір сапасын жақсартуы тиіс, керісінше емес», — деді Исмаилов.
Оның сөзінше, қазіргі шешімдер уақытша тыныс алуға мүмкіндік бергенімен, бұл ұзақмерзімді шешім емес.
«Қазақстан тоңбайды. Қажет болса, үкімет дер кезінде отын сатып алады. Бірақ босаңсуға болмайды — бәрі мұнайға тәуелді», — деп түйіндеді сарапшы.