RUS
SMARTNEWS.KZ басылымының хабарлауынша, «ҚазТрансОйл» АҚ 2025 жылдың тоғыз айындағы қызмет қорытындысын жариялады. Компанияның мәліметінше, мұнай тасымалының жалпы көлемі өткен жылмен салыстырғанда аздап төмендеген.
Есептік кезеңде компанияның жалпы жүк айналымы 33,9 млрд тонна-шақырымды құрап, былтырғы деңгейден 2% жоғары болды. Ал тасымалданған мұнай мен мұнай өнімдерінің жиынтық көлемі — 34,6 млн тонна, бұл өткен жылдың сәйкес кезеңінен 1% аз.
Осы уақытта отандық мұнай өңдеу зауыттарына жеткізілген мұнай көлемі 4%-ға өсіп, 13,6 млн тоннаға жетті.
Аймақтық бағыттар бойынша динамика
«Атырау – Самара» бағытымен 7,75 млн тонна мұнай айдалып, 4% өсім тіркелді.
«ТОН-2» құбырының қазақстандық бөлігі бойынша 8,7 млн тонна мұнай тасымалданып, көрсеткіш тұрақты қалды.
«Атасу – Алашанькоу» желісімен 8,27 млн тонна мұнай айдалды — 1% төмендеу байқалды.
Ең ірі құлдырау Каспий Құбыр Консорциумы (КҚК) жүйесіне тиесілі: мұнда жеткізу көлемі 25% азайып, бар болғаны 2,51 млн тоннаны құрады.
Ақтау портында танкерлерге тиеу көлемі де төмендеп, 2,44 млн тонна болды (–5%).
Басқа бағыттарда өсім бар
Керісінше, «Қазақстан – Қытай құбыры» жүйесі бойынша 14,48 млн тонна мұнай тасымалдалып, былтырмен салыстырғанда 5% артық көрсеткішке жетті. Мұнайдың жүк айналымы да 12,9 млрд тонна-шақырымға жетіп, 4% өсті.
Сондай-ақ «МұнайТас» құбырымен 4,43 млн тонна мұнай айдалып (+5%), жүк айналымы 8% артты.
Ал «Батуми мұнай терминалы» арқылы мұнай, мұнай өнімдері және газды қайта құю көлемі 1,42 млн тонна болды (–3%). Бірақ жалпы жүк айналым 11% өсіп, 5,58 млн тоннаға жетті.
Су тасымалы тұрақты
«Магистральды су құбыры» ЖШС арқылы Атырау мен Маңғыстау облыстарына 20,45 млн текше метр тұщы су жеткізілді — бұл өткен жылғы деңгеймен тең.