RUS
SMARTNEWS.KZ басылымының хабарлауынша, Еуропалық одақ Ресейдің Украинадағы соғысына байланысты 19-пакет санкцияларын бекітті. Жаңа тізімге ресейлік «ВТБ» банкінің Қазақстандағы еншілес ұйымы да енді. Бұл шешімді ЕО Кеңесіне төрағалық етіп отырған Дания растады.
Бұған дейін санкциялық пакеттің қабылдануын Словакия тежеп келген еді. Ел премьері Роберт Фицо Еурокомиссиядан энергоцендер мен ауыр өнеркәсіпті қолдау бойынша кепілдік талап еткен.
Reuters дерегінше, бұл талаптар саммит қорытынды құжатында ескерілген соң, Братислава келісімін берген.
«Құжатты бекіту рәсімі басталды. Егер қарсылық болмаса, пакет ертең таңғы сегізде ресми түрде күшіне енеді», — деп мәлімдеді Дания төрағалығы.
Биыл алғаш рет санкциялар тізіміне ресейлік сұйытылған табиғи газды импорттауға тыйым салу енгізілді. Қысқа мерзімді келісімшарттар алты ай ішінде тоқтатылады, ал ұзақ мерзімді келісімдер 2027 жылдың 1 қаңтарынан бастап күшін жояды. Бұл мерзім — Еурокомиссия ұсынған жоспардан бір жыл бұрын.
Сонымен қатар, жаңа пакетке Ресейдің 117 кемесі — негізінен мұнай тасымалдайтын танкерлер — кірді. Олар бұған дейінгі санкцияларды айналып өтуге көмектескен «көлеңкелі флоттың» бөлігі саналады. Енді ЕО тізімінде барлығы 558 ресейлік кеме бар.
ЕО шектеулері Қазақстан мен Беларусь банктеріне, сондай-ақ мұнай саласына қатысы бар төрт қытайлық компанияға да тарады. Дипломатиялық дереккөздерге сүйенсек, олардың қатарында екі мұнай өңдеу зауыты, бір трейдер және Ресейге санкцияларды айналып өтуге көмектескен делдал құрылым бар.
Қазақстандағы «ВТБ банкке» қатысты шектеулер 2025 жылдың 2 желтоқсанынан бастап күшіне енеді.