RUS
SMARTNEWS.KZ басылымының хабарлауынша, алматылық «Қайрат» клубының қақпашысы Темірлан Анарбеков Чемпиондар лигасы тарихында ең жоғары — 10 балдық баға алған үшінші қақпашы атанды. Мұндай нәтижені халықаралық статистикалық платформа Sofascore тіркеді.
Платформаның ресми Instagram парақшасы 22 жастағы қазақстандық қақпашының «Пафосқа» қарсы ойынын «тарихи кеш» деп атады:
«Темірлан Анарбеков қандай ойын көрсетті десеңізші! Ол жарақаттан кейін алғаш рет Чемпиондар лигасында алаңға шығып, біздің деректер базасында мінсіз — 10 ұпай алған бар-жоғы үшінші қақпашы болды!» — деп жазды Sofascore.
Чемпиондар лигасының топтық кезеңіндегі үшінші турда өткен «Қайрат» – «Пафос» матчы 0:0 есебімен аяқталды. Анарбеков бес сейв жасап, кездесудің үздік ойыншысы атанды.
Жас қақпашының бұл ойыны — оның мансабындағы үлкен серпіліс. Ол тек өз қақпасын «құрғақ» сақтап қана қоймай, еуропалық футбол тарихына да есімін жазды.
Sofascore — Словакияда құрылған халықаралық спорттық аналитикалық портал, ол әлем бойынша 20-дан астам спорт түрінің матчтарын бағалап, статистика жүргізеді.
Айта кетейік, Атырау тумасы Темірлан Анарбеков «Селтикке» қарсы тарихи ойында үш пенальтиді қайтара отырып, «Қайраттың» Чемпиондар лигасының топтық кезеңіне шығуына үлкен үлес қосқан еді.