RUS
Алматы облысы прокуратурасының мәліметінше, 25 наурызда Талғар аудандық полиция басқармасының кезекші бөліміне әйел жүгініп, 30 жастағы бала күтушіге шара қолдануды сұраған. Айтуынша, бала күтушінің үйінде 2 жасар сәбиі көз жұмған.
«Ш. есімді азаматша 5-6 айдан бері ата-анасынан ақы алып, кішкентай балаға күтуші ретінде қарап жүрген.
Сол күні-ақ бұл факті Сотқа дейінгі тергеп-тексерудің бірыңғай тізіліміне ҚР Қылмыстық кодексінің 141-бабы, 2-бөлігінде (Балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау) қарастырылған қылмыстық құқықбұзушылық белгісі бойынша тіркелді.
26 наурызда қылмыстық құқықбұзушылықты 141-баптың 2-бөлігінен ҚР ҚК-нің 99-бабы, 3-бөлігіне (Адам өлтіру) ауыстыру туралы шешім қабылданды», - деп хабарлады Алматы облыстық прокуратурасының баспасөз хатшысы Мақсат Әбіров.
6 сәуірде Талғар ауданы ПБ тергеушісі аудан прокуратурасына екі ай мерзімге «қамауда ұстау түріндегі» бұлтартпау шарасын бекіту туралы өтініш жолдады. Талғар ауданының прокуратурасы өтінішті қолдап, қарау үшін тергеу сотына жіберді.
Қазіргі уақытта сотқа дейінгі тергеу жалғасып жатыр, бірқатар сараптама тағайындалды. ҚР ҚПК 201-бабына сәйкес, басқа ақпарат жария етуге жатпайды.