RUS
SMARTNEWS.KZ басылымының хабарлауынша, Атырау облысында Президент Қасым-Жомарт Тоқаевтың «Жасанды интеллект дәуіріндегі Қазақстан» атты Жолдауынан кейінгі міндеттер талқыланды. Бұл мәселе облыстық ардагерлер кеңесінің VI пленумында қаралды.
Жиында аймақ әкімі Серік Шәпкенов жасанды интеллектіні дамытудың стратегиялық маңызына тоқталып, оны өңір экономикасының жаңа қозғаушы күші ретінде бағалады.
– Жасанды интеллектіні дамыту – тек технология емес, бұл экономиканы жаңа деңгейге көтеретін стратегиялық бағыт. Әлемдік тәжірибе оның тиімділігін дәлелдеді. Сондықтан жаңа технологияларды өңірдің даму басымдығына айналдыру – басты міндетіміз, – деді әкім.
Ресми мәліметке сүйенсек, әкімдік жиын соңында ақсақалдарға облыстың дамуына және жастарды тәрбиелеуге елеулі үлес қосқан ардагерлерге Алғыс хат табыстағанын жаза кеткен.
Алайда бұл жиынның қатысушылары қоғамда қызу талқыланып жатыр. Журналист Диас Нұрақын әлеуметтік желіде сын пікір білдірді.
– Атырау облысының әкімі WhatsApp пен 2GIS-ті әрең меңгеретін ата-апаларды жинап алып, жасанды интеллектіні талқылапты. Клавиатура баса алмайтын, контактілерді сақтай алмайтын адамдарға ЖИ-ді қалай түсіндірді екен? Бізде бәрі науқаншылдыққа айналған. Президент айтты екен деп зал толтырып, есеп берсе болды. Бұл тақырыпты ең болмаса жастармен, студенттермен талқыласа ғой, – деп жазды ол.
Әлеуметтік желілерде пікір екіге бөлінді: бірі «ақсақалдардың өмірлік тәжірибесі мен ақылын ескеріп, олардың да пікірін тыңдау орынды» десе, екіншілері «жасанды интеллект мәселесін нақты осы саланы меңгерген жастармен, IT мамандармен талқылау керек еді» деген уәж айтты.