RUS
TechCrunch хабарлағандай, Atlas дәстүрлі іздеу жолағымен жұмыс істейтін жүйелерден айырмашылығы — пайдаланушымен табиғи тілде сөйлесетін интеллектуалды интерфейске айналмақ.
Сэм Альтман, OpenAI бас директоры:
«Интернетті URL мен іздеу жолағы арқылы шолу дәуірі аяқталды. Ендігі мақсат — адамдарға ақпаратты сөйлесу арқылы ұсыну».
Atlas — жасанды интеллектке негізделген браузер ғана емес, толыққанды цифрлық көмекші. Ол сайттарды жай ғана ашып бермейді, пайдаланушының сұранысын мағынасы менконтексті бойынша түсініп, нақты әрі пайдалы жауап ұсынады.
Мәселен, қолданушы «ең жақсы камера қайсы?» деудің орнына, былай жаза алады:
«Маған саяхатқа қолайлы, жеңіл әрі сапалы камера керек».
Atlas бұл сұранысты нақтылап, контексті бойынша оптималды шешім ұсынады.
Бұрынғыдай іздеу нәтижелерін сүзу қажет емес — енді шешімді жасанды интеллекттің өзі ұсынады.
IT сарапшылардың пікірінше, Atlas — Google экожүйесіне ашық әрі тікелей бәсекелес. Бүгінде Chrome мен Google Search интернет трафигінің басым бөлігін өз бақылауында ұстап отыр. Ал OpenAI болса, осы үстемдікке балама экожүйе ұсынуға ниетті.
Atlas-та жарнама көрсетілмейді, іздеу нәтижелерінде сілтемелер үшін күрес жоқ — барлығы сұхбат форматында жүзеге асады. Бұл модель Google-дің дәстүрлі жарнамалық бизнесіне айтарлықтай соққы болары анық.
OpenAI өкілдері Atlas браузерінің басты қағидаты — пайдаланушының сенімі мен деректер қауіпсіздігін сақтау екенін атап өтті. Компания жеке ақпаратты ешбір жағдайда жарнамалық мақсатта қолданбайтынын және мәлімет өңдеу үдерісінің ашық әрі этикалық негізде жүргізілетінін мәлімдеді.
Atlas осы арқылы «сенімді интернет» концепциясын ұсынып отыр. Бұл тәсіл болашақта бүкіл саланың даму бағытына ықпал етуі мүмкін.
Atlas таныстырылған күні Alphabet (GOOG) акциялары 5%-ға дейін төмендеді. Бұл инвесторлар арасындағы алаңдаушылықтың нақты белгісі ретінде қабылданды. Сарапшылардың пайымдауынша, бұл құбылыс жасанды интеллекттің дәстүрлі іздеу жүйелеріне шын мәнінде қауіп төндіріп келе жатқанын көрсетеді.
Мақала авторы: Ғасыр Құралбай