RUS
SMARTNEWS.KZ басылымының хабарлауынша, марқұм Шерзат Болаттың отбасы жаңа қонысына кірді. Бұл туралы отбасының қорғаушысы, адвокат Мейірман Шекеев хабарлады.
Оның айтуынша, баспана мәселесінің шешілуіне «Асар Уме» қоры, оның жетекшілері Асқар мен Асхаттың жомарттығы, сондай-ақ Алматы облысы әкімдігінің қолдауы мен қарапайым халықтың тілеулестігі себеп болған.
«Қаржаубай отбасы халыққа алғысын білдіреді. Гүлбарам ханымның жүзінен қуаныш пен күлкі көру – біз үшін үлкен бақыт болды. Осы қуанышқа үлес қосқан барлық жандарға ризашылығымызды білдіремін. Қазағымның бірлігі мен бауырмалдығы жасай берсін!» – деді адвокат Мейірман Шекеев.
Сонымен қатар ол отбасының қауіпсіздігін қамтамасыз ету мақсатында бейнебақылау камерасын орнатуға көмектесетін демеушілер іздейтінін де айтты.
Көпшілік әлеуметтік желіде Шерзаттың отбасына жылы лебіздерін білдіріп, жаңа қонысымен құттықтады.