RUS
SMARTNEWS.KZ басылымының хабарлауынша, Президент Қасым-Жомарт Тоқаев елдегі жаңа буын кәсіпкерлер мен IT-мамандарды «Қазақстанның жаңа элитасы» деп атады.
Мемлекет басшысы мұны биылғы ерекше оқиға ретінде аталған Higgsfield AI стартапының жетістігімен байланыстырды. Бұл жоба қазірдің өзінде ел тарихында тұңғыш «сыңармүйіз» стартап (яғни құны миллиард доллардан асқан компания) ретінде бағаланып отыр.
«Higgsfield AI» – жаһандық деңгейде мойындалған қазақстандық табыс тарихының бірі. Президенттің айтуынша, бұл идея алғашында Astana Hub технопаркінде пайда болған. Оны математика мен физикадан халықаралық олимпиадаларда топ жарған жас дарындар қолға алған.
– Осындай білімді, еңбекқор азаматтар – еліміздің келешегі. Жас кәсіпкерлер, ғалымдар, инженерлер мен IT-мамандар қазірдің өзінде Қазақстанның жаңа элитасын қалыптастырып жатыр. Ал жаңашылдық – біздің ұлттық болмысымыздың бір бөлігіне айналды, – деді Тоқаев.
Президент стартап саласындағы бір-екі табыспен шектеліп қалуға болмайтынын да ескертті. Оның айтуынша, мемлекет болашағы бар отандық стартаптарға қолдау көрсетіп, олардың әлемдік нарықта өз орнын табуына жағдай жасауы тиіс.
Сол себепті Үкіметке заманауи және тиімді инновациялық экожүйе құру тапсырылды.
– Егер мемлекет қолдау көрсетсе, біздің балаларымыз бен немерелеріміз әлемдік нарықта сұранысқа ие жоғары технологиялық өнімдер шығара алады, – деді Мемлекет басшысы.