RUS
SMARTNEWS.KZ басылымының хабарлауынша, британ соты Apple компаниясын әділетсіз комиссиялар алып, нарықтағы үстемдігін теріс пайдаланғаны үшін кінәлі деп тапты. Іс бойынша талап сомасы шамамен 1,5 млрд фунт стерлингті (2 млрд доллар) құрайды. Бұл туралы Reuters жазды.
Істі қараған Лондонның бәсекелестік апелляциялық трибуналы 20 миллионнан астам iPhone және iPad пайдаланушыларының мүддесін қорғады. Тергеу қорытындысы бойынша, Apple 2015 жылдан 2020 жылға дейін App Store арқылы қосымшалар сататын әзірлеушілерден 30 пайыздық комиссия алып, бұл арқылы нарықтағы бәсекені шектеген.
Адвокаттардың айтуынша, сол кезеңде әділ комиссия шамамен 17,5 пайыз болуы керек еді. Ал артық төленген 12,5 пайыздың жартысы тұтынушылардың мойнына түскен.
Соттың шешімінде компания «қосымшалар нарығында үстем жағдайын пайдаланып, әділетсіз баға белгілеген» деп жазылған.
Apple өкілдері шешіммен келіспейтінін мәлімдеп, апелляцияға беретінін хабарлады. Компанияның пікірінше, трибуналдың шешімі «қосымшалар нарығындағы әділ және ашық бәсекелестікті дұрыс сипаттамайды».
Бұл істі бастаған Лондон экономика мектебінің профессоры Рэйчел Кент Apple-ді «қосымшалар мен ішкі сатып алу жүйесін толық монополияға айналдырды» деп айыптады.