RUS
SMARTNEWS.KZ басылымының хабарлауынша, Қазақстан ұлттық құрамасының бұрынғы ойыншысы Руслан Валиуллин маусым соңында «Қызылжар» клубымен қош айтысады. Бұл туралы Sports24.kz жазды.
Клубтың бапкерлер құрамы футболшының соңғы кездегі ойынына көңілі толмай, оны негізгі құрамнан шеттеткен. Соңғы турларда оның орнын Кот-д’Ивуардан келген легионер Абдул Азиз Туре толық иеленіп, Валиуллин алаңға шықпай қалды.
29 жастағы жартылай қорғаушы биыл маусым басында «Қызылжарға» ауысқан. Алайда 21 матчта бірде-бір нәтижелі әрекет жасай алмай, бапкерлер сенімінен айырылды.
Айта кетейік, 2021 жылы Руслан Валиуллин допинг-тесттен өте алмай, екі жылға футболдан шеттетілген болатын. Спортқа қайта оралғаннан кейін де ол бұрынғы бабына келе алған жоқ.
Қазір футболшының қай клубқа ауысатыны белгісіз. Сарапшылардың пікірінше, бұл — оның мансабындағы шешуші кезең. Егер Валиуллин өзіне жаңа команда тауып, ойын деңгейін қайта көрсете алмаса, кәсіби футболдағы жолы осымен аяқталуы мүмкін.